Johnny colleu o seu fusil

Coma todos, Johnny foi á guerra co símbolo da vitoria. Nunca máis volvería poder facer este xesto. 

Brutal peli, na que a banda Metallica se inspirou para dar o mellor tema metal da Historia: One.
Cun clic no cartel, podedes escoitar e ver o potente videoclip, gravado con imaxes da película.

É curioso o por que do título. Na I Guerra Mundial había unha melodía que convidaba a un tal Johnny e a todos os mozos estadounidenses a poñerse patrióticos, coller as armas e marchar á fronte a defender a nación. O título desta película é xustamente unha resposta a iso. Dinos o que pasou con aquel mozo da canción... E pasou que, en efecto, Johnny colleu o seu fusil, despediuse dos seus, marchou á guerra... e volveu dela mutilado e impedido de por vida.

O argumento incomoda e agobia. Ferido pola explosión dunha bomba e encamado nun hospital, Johnny ve impotente como vai perdendo as pernas, os brazos, a vista, o oído, o olfato e o gusto. Reducido a un torso tapado por unha saba, todos os seus esforzos se centrarán en lograr comunicarse dalgún xeito cos médicos, para pedirlles que o maten, mentres chora por dentro, lembrando a súa historia. Que se parece moito a de todos eses mozos que mandaron a unha guerra allea, estúpida e cruel. A mesma que estudamos.

Dádelle unha oportunidade. Inesquecible. Diferente a Carreiros de Gloria... e tamén a War Horse!