Sucedeu ao mesmo tempo que España se mataba a tiros, en 1936. Ao outro lado do charco Estados Unidos vivía a súa Gran Depresión, esa crise económica longuísima que comezou tras o crash da delirante burbulla especulativa de 1929. O caso é que o país estaba tocado, e parte da poboación tocada e afundida. Como Florence Owens, unha muller que, sen pretendelo, ía converterse en icono de toda aquela miseria. Aquel día, tiña 7 fillos e tan só 32 anos... pero na súa mirada estaba toda a pobreza, inxustiza e desilusión do que lle tocou vivir.
Como tantos outros campesiños, a familia da foto perdera as súas terras e granxas véndose obrigados a cruzar o país cara a costa Oeste en busca de traballo. Tras un inverno de penurias comendo só vexetais fríos e algún paxaro, estaban parados porque tiveran que vender dúas rodas da camioneta para comprar alimentos. E nesas apareceu a fotógrafa, Dorothea Lange, quen non estaba alí por casualidade senón contratada polo goberno para facer unha reportaxe acerca das condicións de vida nas zonas rurais do país... Naquel encontro é onde nace o famoso retrato, como parte dunha secuencia completa que, sen ser tan brillante, capta perfectamente a penosa situación na que estaban, baixo un simple cuberto de lona e paus.
Agardaban con outros dous mil campesiños a que os contrataran para recoller chícharos. Pero como a can fraco todo son pulgas, aquel ano a colleita fora mala con ganas e non había traballo para todos. O único que había era pó. Enormes nubes de pó e area que, ante a ausencia de choivas, o vento levantaba do chan extremadamente seco ata tapalo todo.
 |
| Vía |
Era o Dust Bowl ou Cunco de Area: un impresionante fenómeno meteorolóxico que, derivado da desertización do solo, acabou multiplicando a miseria da crise e as migracións masivas de campesiños cara a costa durante os anos trinta. E vendo a paisaxe, seguramente se entenda mellor a mirada da muller da fotografía.
Así foi a vida de Florence e o campesiñado durante a maldita Gran Depresión.
Como en "As uvas da ira":
aquela novela, aquela película, aquela Historia.
Comentarios
Publicar un comentario
Grazas por comentar!