Zeppelines

Os zeppelin tiveron a súa época dourada entre 1900 e 1930, facéndose famosos durante a Primeira Guerra Mundial por ser empregados por Alemaña para bombardear a Reino Unido, onde só ver a súa silueta no aire chegou a ser un motivo de terror para a poboación. 

A peculiar aeronave lograba sosterse no aire mediante depósitos cheos dun gas menos denso que o da atmósfera: o hidróxeno. Pero a pesar de ser este moi inflamable, os británicos desesperáronse no intento de lograr un xeito de derrubalos, porque ao disparar sobre eles o único que se lograba era facerlle pequenos furados que en nada lle afectaban. A solución acabaría chegando da man dunha especie de balas incendiarias que, tras perforar o globo, explotaban no seu interior provocando que a enorme cantidade de gas almacenado se incendiase.

Curiosamente os alemáns quedaron sen salchichas, un dos seus produtos nacionais, precisamente para construír estes mastodontes. E diredes vós: e que terá que ver un zeppelin cunha salchicha? Pois ten que ver! A pel da salchicha faise con tripa de vaca. E a que non sabedes con que material se fabricaban as bolsas para conter o hidróxeno co que voaban os zeppelins? Tripa de vaca! Facían falta intestinos de vaca a moreas! Por iso os alemáns prohibiron totalmente a fabricación de salchichas durante a Gran Guerra. Para construír zeppelins.

O invento das balas incendiarias chafou un pouco o éxito destas aeronaves. Pero o que de verdade acabaría con elas serían algúns accidentes graves. O accidente definitivo sucedeu precisamente cun zeppelin da Alemaña nazi: o Hindenburg, unha das aeronaves máis grandes xamais construídas (245 metros de longo!). O 6 de maio de 1937, cando tras cruzar o Atlántico estaba xa a punto de aterrar na cidade estadounidense de New Jersey baixo unha tormenta eléctrica, o Hindenburg incendiouse no aire, converténdose nunha enorme bola de lume ante o pánico dos que o agardaban na pista. A prensa e as cámaras gravaron aquel día todo o suceso, deixándonos imaxes impresionantes para a Historia, nas que se ve o aparato ardendo e desplomándose sobre o chan, e se distinguen algunhas persoas saíndo ás carreiras dun zeppelin absolutamente envolto en chamas.

Clic para ver o vídeo daquel momento

No minuto 2:45 comeza o desastre

Vía

Precisamente o grupo de rock Led Zepellin,

utilizou esta impactante imaxe para a portada do seu primeiro disco.