iDiot. iDiotízate!

Estamos idiotizándonos que mete medo. E autoenganámonos dicindo que non. Pero a tecnoloxía está a volvernos a todos tan estúpidos e dependentes, que o día que nos falle seremos completamente inútiles e infelices. Xa pasamos máis tempo diante das pantallas que fóra delas. Especialmente ante as pantallas dos smartphones. E esa estúpida dependencia é a que, con moita intelixencia e retranca, nos ensina a ácida curtametraxe "iDiots". Catro minutos gloriosos, para denunciar unha sociedade escravizada pola tecnoloxía e os donos do negocio.

Atréveste a verte retratado co teu smartphone?

Clic na imaxe para velo!

Que pasou o pasado fin de semana?  Que pasou cando Whatsapp caeu deixando aos seus usuarios de todo o mundo sen servizo durante só unhas horas? Pasou que un pequeno corte no funcionamento dunha aplicación foi unha enorme fonte de cabreo, amargura e insatisfacción para moitos, converténdose rapidamente nunha preocupación a escala mundial (con trending topic e todo iso). Por uns minutos sen unha estúpida aplicación!

Deberíamos baixarnos do carro e pararnos a pensar. Internet e os smartphones son unha ferramenta de comunicación marabillosa, pero só son iso: unha ferramenta. Un medio para axudar nas tarefas do día a día. Se a felicidade da nosa vida depende dunha estúpida aplicación ou dun maldito teléfono, entón é que non a merecemos. 

En realidade, 
a Vida é iso que pasa mentres ves o Whatsapp.