Persépole: o comic

Persépole é un cómic cheo de méritos: divirte, critica, e fainos cómplices dunha nena intelixente que nos resulta familiar (a propia autora). Pero ademais, Persépole serve para desterrar tópicos, para formularnos preguntas, para achegarnos de maneira moi visual e esperta á vida nun país (Irán) e nunha cultura (a islámica), da que apenas sabemos nada. Hai cómics que non son de superheroes con superpoderes, senón de persoas normais que, sinxelamente, intentan vivir da maneira máis digna posible. Gustaravos Marjane. Gustaravos Persépole.

Marjane é unha nena criada en Irán, pero educada ao estilo occidental. Non leva velo, gústalle xogar ao Monopoly, fala todas as noites con Deus (ao que lle atopa un enorme parecido físico con Marx!) e de maior quere ser profeta... ou revolucionaria... ou doctora. Era un Irán moderno, os seus pais eran modernos, e ela tamén quería selo.  Unha nena normal nun Irán que... Acaso non é o que pensamos?

Pero en 1979, con só 10 anos, unha Revolución Islámica cambiará a súa vida para sempre. Cos fundamentalistas no poder, Irán convértese rápido nunha negra sombra do que era: recupérase o velo como sinal de decencia (Marji non sabe que facer con el, nunca o levara!), fanse normas que prohiben todo símbolo da cultura occidental (incluso a música!), e aparece un terrible control e represión contra todos aqueles que non levan un "estilo de vida islámico".

Por iso, cando ten 14 anos, os pais de Marjie deciden que Irán xa non é un país para ela, e mándana a estudar a Austria. Alí, conforme se vai facendo adulta, descubrirá que Europa, pese ao que todos pensamos, non é moito mellor cá Irán... Unha lectura para descubrir o valor da novela gráfica, e para aprender a ver mais aló da nosa burbulla. Que vos guste!

"Vivir nunha prisión non é unha vida"

"O medo fainos perder a conciencia e convértenos en covardes"