Normandía? Non... Laxe, Galicia

Como me gusta esta foto!

Tres nenos galegos apenas poden crer o que ven. Un avión de combate estadounidense acaba de pousarse no areal de Traba. É domingo e, hai tan só uns minutos, todos os veciños vírono cruzar o ceo, perdendo altura cara á praia, cos motores ruxindo e a cabina empezando a arder. Achéganse correndo. Detéñense. Dubidan. Desexan coñecer, pero temen que a forza do mar o desprace cara eles... A poucos metros, piloto e acompañante queiman apresurados un feixe de papeis, e xesticulan mentres berran algo estraño, que sona a: Fon! Fon, plis! Fon!

Era o 22 de outubro de 1944, o desembarco aliado en Normandía triunfara e o cerco aos nazis empezaba a debuxarse. Galicia, pese a estar lonxe da fronte, era frecuente zona de paso para navíos, submarinos e aviación de ambos bandos. Aquel día, Eugene Casale e John Kurek viaxaban nun bombardeiro Douglas A-26 desde Marrocos a Inglaterra, cando a cabina empezou a arder, e víronse obrigados a unha aterraxe forzosa. Os veciños acudiron e atoparon aos dous homes queimando documentación, facendo xestos para avisar do risco de explosión e preguntando por... un teléfono! 

A fotografía foi realizada daquela por un retratista de Laxe, José Vidal. Pero o máis bonito desta historia vén agora. Porque grazas a ela, e tirando do fío, varias persoas veñen de lograr localizar en Connecticut (Estados Unidos) a Eugene, o home que aquel día fixo aterrar este avión na praia de Traba. E contan que con 92 anos, o vello piloto (a vista e a memoria desgastadas) sostivo nas mans a fotografía do seu plateado aeroplano, mentres dicía... Mira, este era o meu avión. E esa era a xente que nos axudou. E esta, como se chama?... esta era a praia máis fermosa que vin nunca...

E non me estraña... 

Feliz reencontro. 

Feliz capítulo (que xa é difícil...) da IIGM.