A vida é como ver os Simpson: a máis cultura, mellor entendes. E nese propósito de entender as cousas da vida (... ou as dos Simpson), saber Historia é unha axuda grande. Hoxe traio un exemplo...
Onde estabades en 1996? Os meus alumnos creo que nacendo, ou próximos a facelo, así que a moitos non vos sonará o anuncio. Pero a outros si, desde logo. Para que vos situedes no tempo, daquela eu estaba empezando a carreira. E coma min, moitos. España empezaba a cambiar (...parezo un capítulo de "Cuéntame"), ao ir aparecendo unha xeración de mozos moito máis preparada que a dos seus pais, e con terribles ganas de comerse o mundo. Foi entón, naquel preciso momento dos noventa, cando Renault, nos sorprendeu cun anuncio que parecía feito á medida daqueles mozos: o do primeiro modelo Clio (nótase o paso dos anos, verdade?), ou tamén chamado "anuncio JASP". A fotografía correspóndese coa versión para a prensa; a versión para a tele, facendo Clic na imaxe.
Querían así vendernos que o Clio debía ser o noso coche, pois tamén el era JASP: novo, pero sobradamente preparado. O caso é que aquel anuncio pegou forte entre os mozos. E algún tempo despois, estudando Historia, sorprendinme moito ao descubrir que JASP non era unha rara idea nova, senón unha enxeñosa modificación dunhas siglas xa creadas no pasado: WASP. En Estados Unidos este era o nome co que se recoñecía a un grupo de cidadáns puritanos e intolerantes, que se crían superiores a todos os demais. Eran os WASP (White, Anglo-Saxon, Protestant). É dicir, brancos descendentes de europeos do norte. Pero racistas.
En Renault, cambiaron tan só unha letra para dar un novo significado, moito máis agradable e positivo que o anterior. E desta maneira, como daquela, lograron algo relativamente complicado: que un grupo concreto de xente nos recoñecéramos (ou quixéramos facelo) con tan só catro letras... e de paso, cun modelo de coche. Daqueles WASP non queda moito, afortunadamente. E en canto a aqueles JASP... Era mentira: nunca estaremos sobradamente preparados!
Comentarios
Publicar un comentario
Grazas por comentar!