Saltar ao contido principal

Guidoiro Areoso: A illa dos Mortos

Souben dela hai anos, cando un amigo arqueólogo trataba de contarme como era aquel illote chantado en plena ría de Arousa, ao que foran escavar unha extraña mámoa durante todo un verán. Apenas lembro os datos arqueolóxicos, pero nunca esquecerei a mirada que se lle poñía nos ollos mentres debuxaba no aire os detalles daquel paraíso branco emerxendo do mar.




O caso é que desde os anos oitenta coñécese no pequeno Guidoiro Areoso a existencia de varias mámoas, pero estes días soubemos que o ciclo das mareas e os embates do mar están a destapar alí unha sorprendente necrópole megalítica de, polo menos, cinco mil anos. Nun lugar verdadeiramente único, como veredes no vídeo. Non sabemos se daquela xa era unha illa (precisarían de Caronte para conducir aos mortos ata alí...) ou so unha península unida ao continente; descoñecemos que puido empuxar a aquelas xentes da prehistoria a elixir un lugar así para erixir nel a morada dos mortos; e mesmo ignoramos durante cantos séculos empregaron ese sitio cunha finalidade ritual. Pero se hai algo seguro, é que os seus promotores tiveron que ver nese illote un espazo cun valor moi especial. Tan especial polo menos como para confiarlle a morte... O marabilloso deste lugar enténdese á perfección co magnífico vídeo de Manuel Gago:




Isto, aquí, é algo único. Pero existen illas-cemiterio similares ao Guidoiro Areoso ciscadas pola Europa atlántica. Alí, como imaxinades, son un patrimonio de primeiro nivel: protexido, divulgado, valorado e aberto ás visitas da poboación. Non son so un xacemento; son un símbolo, son identidade, son a historia que nos explica. A pregunta é se tamén nós seremos quen de xestionar o tesouro que o mar nos está a devolver... 

Comentarios

  1. Andrea Ledo27/1/12

    Encántame a reportaxe sobre a illa! é magnífica! Demos xa a época megalítica en xeografía e historia de Galicia, pero en ningún momento saiu este sitio, por descoñecemento básicamente. É xenial. Sabes da existencia dun asentamento vikingo en Galicia?

    ResponderEliminar
  2. Alégrame que che gustara, Andrea. É certo que esta illa permanece aínda moi oculta á hora de falar do megalitismo, pois temos miles de monumentos deste tipo en Galicia, e hainos moito mellor coñecidos. Pero poucos, seguro, coa maxia deste lugar.

    Que boa pregunta! Os viquingos supuxeron un problema moi gordo aquí na idade media. Eu creo que non se coñece asentamento algún. O que si hai é restos de defensas contra eles, para evitar que se adentrasen en terra remontando os ríos desde a súa desembocadura. Por exemplo, na ría de Arousa están aínda as Torres do Oeste (en Catoira: festa viquinga o 1º domingo de agosto), que se levantaron para evitar que remontaran o río Ulla e chegasen a Santiago (cidade que se trasladou desde Iria Flavia precisamente para alonxarse da ameaza viquinga). Non sei se o sabes, pero tamén arrasaron Bretoña, que era sede dun obispo daquela. A partir de entón, a sede mudouse a Mondoñedo!

    Hai un libro recomendable: "Os viquingos en Galicia", Eduardo Morales, Ediciós do Castro. Igual o hai na biblio...

    ResponderEliminar
  3. Andrea Ledo27/1/12

    Mira esta noticia, saiu fai algúns meses no progreso:http://elprogreso.galiciae.com/nova/124272.html?lang=es
    É xenial!Que opinas?
    Estou pensando en facer un traballo sobre os Vikingos en Galicia para xeografía e historia de Galicia, porque nos mandou facer un traballo e podemos escoller o tema así que o libro vírame ben. O luns mirarei a ver se o hai, e senón tratarei de conseguilo!

    ResponderEliminar
  4. Que grande, Andrea... Pois opino coma ti! Que é xenial! Non coñecía o xacemento do Vicedo, e agora estou desexando ir ver os Moutillós!! Ti viches en foto aérea o impresionante lugar no que está?

    E o mellor é que en Galicia hai moitos lugares que se tiñan por castros enanos, e que quizá haxa que revisar para comprobar se poden ser Moutas coma estas... Mira estes dous textos:
    http://www.manuelgago.org/blog/index.php/2011/05/08/republicas-de-homes-libres-o-misterio-moutillos/
    http://www.manuelgago.org/blog/index.php/2011/03/13/republicas-de-homes-libres-as-motas-galegas/

    Paréceme unha magnífica idea que fagas ese traballo dos viquingos. É orixinal, é un capítulo da historia moi pouco traballado, toca un tema que che gusta e tes un punto de partida interesante nesta idea das Moutas. Haberá moutas en Meira?

    Éxito asegurado!

    ResponderEliminar
  5. Andrea Ledo27/1/12

    Sí! No blog de Manuel Gago explícao xenial, aparte de explicar como os facían as fotos son impresionantes! E despois lendo o de castro Candaz aínda me abraiei máis...é unha auténtica obra de arte!
    Seguro que hai máis motas das que imaxinamos, pero hai tendencia a decir, como di Manuel Gago, que todo é castro, cando o feito de ser unha mota é algo alucinante...unha proba de que os normados estiveron aquí! Todo o que se poida averiguar dun período tan descoñecido é tremendamente importante!

    ResponderEliminar

Publicar un comentario

Grazas por comentar!

Publicacións populares deste blog

6º Concurso CineHistoria

Despois de 5 edicións, non pensaríades que deixaríamos acabar o curso sen o noso concurso favorito, non...? Pois benvidos a CineHistoria! , o certame de minicríticas de cine máis famoso da comarca!  Velaquí as 40 críticas (en formato orixinal) desta edición,. Podedes lelas todiñas nos comentarios! As normas e o sentido do concurso xa o sabedes , pero por se acaso...: Para quen? Participan os meus alumnos de Historia de 1º de Bacharelato . Este ano, 40. Que teñen que facer? Eu reparto unha listaxe dunhas 50 pelis .  Cada un deles ten que elixir unha para ver antes dunha data límite. Condición obrigada: que non a viran nunca!  Onde e cando? Cando acabou o tempo para ver as pelis, un día, sen previo aviso reparto en clase un papel.  Cada participante ten 8 liñas e uns 20 minutos para escribir . Como facelo? A crítica debe ser algo máis que un resumo. Debe ter opinión, análise, orixinalidade e, sobre todo, espertar unha emoción no que le. Prohibido deix

V Concurso CineHistoria

Os bos costumes non se poden perder. Por iso, había que volver coa quinta edición do Concurso máis lonxevo (creo) do noso instituto.  Como cada ano, convoco aos meus alumnos de Historia do Mundo Contemporáneo (1º Bacharelato) a un certame, que non é máis que unha escusa para ver cine... e, a través dese cine, para tecer lazos invisibles coa Historia, ou sinxelamente coa vida .  Que como o facemos? Doado. Entrego unha lista ampla de películas coas que un se pode achegar á Historia (ou ao bo cine); concedemos un prazo de tempo para que cada alumno poida ver polo menos unha delas; e cando todos teñen visto xa a súa peli, chego un día por sorpresa a clase e exclamo: " Aquí comeza o Concurso de Críticas CineHistoria! ";  ese día, nun silencio de 20 minutos e baixo pseudónimo, cada alumno esfórzase por escribir a crítica da peli que viu, sabendo que debe facelo da forma máis persoal, orixinal e efectiva posible...   Con que premio? Con cal vai ser! Aquí comeza o V CONCURS

Concurso Galicia en Foto (II)

Aquí volve o noso concurso! E unha vez máis, non penso dicir onde está isto ... Porque queda da vosa man! Iso si, desta vez cambiamos o método de resposta: en vez de escribir a solución publicamente nun comentario, enviarédesma a min directamente facendo clic na parte superior do blog, onde di "INFO", e dentro diso en "CONTACTO". Unha vez aí, non tedes máis que poñer nome, email e a vosa resposta! Deste xeito chegará a min sen que outros poidan vela.  Gaña quen acerte o nome concreto e a función do lugar no que botei esta foto .  Tal e como prometera, desta vez agarda un premio de cine! O PRAZO PARA CONCURSAR  REMATA ÁS 23.00 HORAS DO SÁBADO 9 PUBLICAREI TODAS AS RESPOSTAS E O GAÑADOR AQUÍ AO LONGO DO DOMINGO 10 BRAVO CENTURIÓNS! O lugar da foto é o fermoso campamento romano de Aquis Querquennis,  en Bande (Ourense). Os vellos coñecían o sitio como A Cidá, pois vían muros e obras de edificacións antigas.  En 1947, ao construírse o Encoro d