"Canto máis tempo pasa, máis lamento o que ocorreu. Non debimos facelo. Nin sequera aprendemos dabondo desta misión, como para xustificar a perda do animal".
Laika converteuse no primeiro astronauta da Historia. Foi un 3 de Novembro de 1957, en plena Guerra Fría, coa antiga URSS e EEUU enfrontados por demostrar cal era máis potencia, cal tiña o mellor sistema, cal podía chegar máis lonxe e máis rápido. Dentro desa guerra, chamada Fría porque nunca chegou ao enfrontamento militar directo, estaba tamén a carreira por ver quen chegaba antes ao espazo exterior. E aí a URSS anotárase un tanto apenas un mes antes, ao ser quen de poñer en órbita por vez primeira un satélite: o Sputnik. Días despois, nun acontemento preparado para sorprender novamente ao mundo, Laika era lanzada ao espazo no pequeno Sputnik 2... Foi o primeiro ser vivo en saír ao espazo, pero todos sabían que non volvería.
Vendida a noticia como un sacrificio necesario para o avance da ciencia, Laika foi recollida das rúas de Moscú para ser adestrada en centrifugadoras e máquinas que simulaban a aceleración, as condicións e os ruídos que tería que soportar. Optouse por varios cans abandonados porque pensouse que estarían xa afeitos a sobrevivir en duras condicións (frío, fame). Unha vez adestrados, ela foi a seleccionada para ser enviada ao espazo... e para morrer nel.
Encariñados con ela, á que describían como intelixente e moi tranquila, algúns científicos compadecéronse do que lle agardaba. Un deles levouna a pasar a fin de semana á súa casa, para que xogara cos seus fillos:
E o mesmo día do lanzamento, algúns non podían borrar da súa mente que xamais volverían a vela:
Encariñados con ela, á que describían como intelixente e moi tranquila, algúns científicos compadecéronse do que lle agardaba. Un deles levouna a pasar a fin de semana á súa casa, para que xogara cos seus fillos:
"Quería facer algo bo por ela: quedáballe tan pouco de vida".
E o mesmo día do lanzamento, algúns non podían borrar da súa mente que xamais volverían a vela:
"Despois da colocación de Laika no aparello e antes de pechar a comporta, bicámola no fuciño e desexámoslle boa viaxe, sabendo que non ía sobrevivir ao voo".
Da novela gráfica "Laika", de Rick Abadzis. Vía. |
O plan era mantela viva uns días e darlle eutanasia mediante comida envenenada, antes de que o Sputnik 2 se desintegrara. O goberno ruso sostivo que isto foi o que pasou, e non foi ata 2002 cando soubemos que a realidade fora outra ben distinta. Laika só durou con vida unhas seis horas. No despegue o seu ritmo cardíaco pasou de 103 a 240 latexos por minuto e o ritmo respiratorio multiplicouse por 3 ou 4. A pequena cadela morreu polo estrés e polo sobrequecemento da cabina, ao fallar o sistema de control da temperatura. Nese tempo, o Sputnik dera xa catro voltas á terra. Con Laika morta no seu interior, continuou aínda orbitando 170 días máis, ata que o 4 de Abril de 1958 desintegrouse totalmente ao entrar en contacto coa atmosfera terrestre.
Laika foi outra triste vítima da Guerra Fría. Ningunha homenaxe das que viñeron logo, nin sequera os monumentos, a fama, ou o costume de pór o seu nome ás cadelas de medio mundo, serviron para nada. Salvo para non esquecer o que os humanos somos capaces de facer con animais tan incriblemente fermosos, intelixentes e leais como era ela.
Comentarios
Publicar un comentario
Grazas por comentar!