30/10/14

Cemiterios, con outros ollos

30/10/14

Gústanme os cemiterios. Dito así sei que sona raro, e de feito lembro ben os xestos dalgúns a primeira vez que me oíron dicir isto. Pero son xestos que só duran o tempo que tardo en explicalo un pouco. Naturalmente, non falo de cando temos que ir pola morte dun amigo ou dun familiar, senón de cando o facemos sen motivo aparente. Polas ganas de viaxar, de descubrir, de dar corda á curiosidade, de concedernos un paseo atento e con tempo suficiente para atreverse a entrar e a perderse nos detalles.

Cementerio de Montmartre, París
Só cando vamos a eles así, coa atención en vilo, a mirada atenta e a mente libre de prexuízos, aparecen os motivos para velos como o que realmente son: lugares especiais, cheos de historias, apelidos, epitafios curiosos, símbolos e esculturas dignas das mellores novelas. Todo cemiterio esconde sempre algo inesperadamente fermoso, inquedante, conmovedor, que axuda a deter o tempo.

Cementerio de Montmartre, París
O bico da morte, no cemiterio de Poblenou, Barcelona (Fotografía de Lord Checa)
Non creades que fai falla ir moi lonxe para ver obras coma esta. En Galicia tamén hai cemiterios incribles que apenas son coñecidos polo común da poboación. Como o de Noia ou o de Santa Mariña Dozo, en Cambados, entre impresionantes ruínas medievais.

Santa Mariña Dozo, Cambados



Ou os neogóticos da Terra Chá, como o de Goiriz (Vilalba) ou o de Trobo (Begonte), onde as tumbas parecen apuntar ao ceo cos seus pináculos e as entradas dos camposantos dan a benvida con mensaxes que obrigan a parar e repensalo todo.

Trobo, Begonte (Fotografía de Jorge Coira)


Ou os máis antigos dos que hai nas grandes cidades: San Froilán en Lugo, San Francisco en Ourense, San Amaro na Coruña, ou Pereiró en Vigo. Lugares nos que un nunca poderá deixar de sorprenderse e abrir moito os ollos ante os pequenos detalles que van xurdindo a cada paso, mentres un camiña calado e atento, aprendendo a ver mellor a morte... e de paso a vivir mellor a vida.

Cementerio de Pereiró, Vigo. Unha tumba pola que xa paga a pena unha visita.

Agora que vén Defuntos e os cemiterios se encherán de xente por un día,
quizais sexa unha boa oportunidade para mirar estes lugares con tempo e ollos curiosos.

Recibe os contidos no teu correo

0 comentarios

Publicar un comentario

Grazas por comentar!

ˆ
MIGUEL ABRAIRA © - DISEÑO: HERPARK