A Escopetarra: de fusil a guitarra

Unha que? 
Pois iso: un AK-47 + Guitarra = unha Escopetarra!

Esta curiosa historia empezou hai dez anos en Colombia. O músico César López intentaba combater a violencia no país por medio dun Batallón Artístico de Reacción Inmediata. Tela! Cada vez que había un atentado, o Batallón corría ao lugar armado con guitarras normais e correntes: "A xente cantaba con nós e chorábamos todos". Ata que un día estala un coche bomba nun edificio da capital, Bogotá. Trinta e seis mortos e máis de douscentos feridos. E cando César López e o seu Batallón se achegan correndo para entrar, atópanse cun soldado que lles franquea o paso: 

"Co seu fusil rompeume a guitarra. 

Quedámonos mirando, coas nosas armas colgando, e entón veume a idea". 

Os AK-47 convertidos en escopetarras foron de persoas que abandonaron as guerrillas. O goberno cedeu a César López algunhas destas armas, xa inutilizadas. E con elas, o luthier Alberto Paredes fabricou os instrumentos a partir dun rifle Winchester e unha guitarra Stratocaster. Din que é máis difícil de tocar cá unha guitarra convencional porque non ten caixa que permita descansar o brazo, pero que pola contra nunca se desafina... E onte mesmo, por exemplo, unha delas sonou melodiosa e creativa (tan diferente ao son orixinal) na sede da ONU en New York. Apetécevos saber como sona?

Como poden cambiar as cousas cando as repensamos...

Quen ía dicir que unha arma tan mortífera e presente no mundo como un Kalashnikov puidera servir para facer música, para unir ás persoas, ou para promover a vida con ela.