19/06/13

Egoístas

19/06/13

Hai que ser moi bruto para roubar un grafiti enteiro. Dunha parede!




"Traballo escravo" era un grafiti presuntamente feito por Banksy (clic para ver máis) en Londres. Nel víase a un neno asiático cosendo bandeiras británicas. Unha mensaxe do máis crítica. Pero o realmente provocativo era onde aparecera pintado: no muro dun comercio sinalado por importar produtos fabricados na India en condicións de explotación infantil. Ademais, daquela (maio de 2012) Londres andaba en pleno fervor patriótico, cheo de bandeirolos e outros estandartes, para conmemorar o 50 aniversario da raíña no trono. Así que, se poñan como se poñan (que se é un grafiti, que se é vandalismo...), isto era unha obra de arte. Removía conciencias e melloraba o entorno. 

As malas linguas din que foi a propia tenda a que arrincou a obra para especular con ela (Banksy cotízase!) e vendela por máis dun millón de euros! Segundo a policía británica non habería nada ilegal nisto... así que xa o podedes dar por perdido. No seu lugar, agora pódese ler outra inscrición: "Perigo, ladróns".

Que? Difícil de superar...? Pois non, home, non! Aínda se podía mellorar! Ou a ver por que non se vai a poder roubar dun xacemento un cacho de rocha no que os científicos estudan un fósil de dinosaurio que leva alí 70 millóns de anos?

Fotografía que aparecía na noticia, en EL PAÍS.
Era o fósil dunha cría de dinosaurio no seu niño. Na imaxe recoñécense cinco ou seis vértebras. Toda a información nova que se agardaba, todo o valor que tería para a comarca na que se atopou, todo se foi co miserable de turno, que tivo que tirar a rocha a rolos por unha ladeira para levala. Como no grafiti, tamén isto era un tesouro de todos. E tamén axudaba a facernos mellores.

De todos os defectos humanos,
o egoísmo é sen dúbida o que nos fai máis miserables.

Recibe os contidos no teu correo

0 comentarios

Publicar un comentario

Grazas por comentar!

ˆ
MIGUEL ABRAIRA © - DISEÑO: HERPARK