Chico y Rita

Esta noite entréganse os Óscar. E neles compite Chico y Rita: unha peli española que é un pedazo de obra de arte, e que loitará hoxe por gañar na sección de Mellor Película de Animación.

Chico é o pianista. Rita é a cantante. Pero xuntos son o talento, a sensualidade, a cor, a música, o amor, a vida... A súa historia é como a dunha desas cancións que narran un amor de idas e voltas que, por ridículos e imposibles azares da vida, nunca remata de atopar a oportunidade que merece. É a historia dun amor imantado, magnético. 

Os escenarios son coma eles: por un lado, a hipnótica La Habana de 1949, unha cidade de balcóns abertos e cores luminosas; polo outro o New York de inicios de 1950, noitarego e preñado de promesas. Pero máis aló dos trazos, do cómic, das cores, toda a película é unha explosión visual e acústica que retrata unha época de novos grafismos, moda, curvas, coches, arquitectura, neóns, carteis publicitarios, cabarets e clubs de jazz... Podedes comprobar fermosos detalles do como se fixo AQUÍ. O trailer, coma sempre, facendo clic no cartel.

Quizá vos atrape. 

Quizá vos vexades nela. 

Quizá coñezades un Chico ou unha Rita que vos faga ir e vir. 

Quizá un día fagades unha longa viaxe para dicirlle a alguén: Necesitaba volver a besarte. 

CHICO Y RITA, F. Trueba e J. Mariscal

Sorte esta noite, en Los Ángeles.