Falando de Gandhi e da descolonización da India, preguntáronme en clase se era verdade que este lle escribira unha carta a Hitler. E si, é certo. O caso é que, contrariamente ao que eu pensaba, a carta consérvase. É máis, non foi unha, senón dúas as misivas que Gandhi quixo facer chegar a Hitler, coa intención de convencelo de que non levase ao mundo a unha guerra fatídica.
Vía |
Curiosamente, nin Gandhi nin Hitler souberon a verdade: ningunha das dúas cartas chegarían nunca a mans do Führer. O goberno británico encargouse de evitalo, dándoas a coñecer cando ambos xa estaban mortos: Gandhi asasinado, e Hitler suicidado... ou iso din.
Pensaredes quizais que Gandhi era un arrogante. A que ven senón que se atrevese a escribirlle a un tolo coma Hitler? Quen lle deu vela para ese enterro? Que lle podía importar a un indio, por moi líder pacifista que fose, o que sucedese nese berce de explotadores imperialistas que era Europa? Pero non. As decisións de Hitler importábanlle moito e afectábanlle a el e ao seu pobo de maneira directa. Gandhi sabía que se Alemaña provocaba unha guerra, Reino Unido non tardaría en responder. E Reino Unido era, amiguiños, a metrópole que dominaba a India... O líder hindú non se equivocaba. Un mes despois de escribir a carta que vedes na imaxe, Hitler invadía Polonia. E só dous días despois, Reino Unido declaráballe a guerra. A India, colonia británica, acababa de entrar, sen bebelo nin comelo, na Segunda Guerra Mundial.
Algúns amigos instáronme a escribirlle en nome da humanidade. Pero resistinme á súa petición, porque me parecía que unha carta miña sería unha impertinencia. Con todo, algo me di que non teño que calcular, e teño que facer o meu chamamento por todo o que pague a pena.
Está moi claro que é vostede hoxe a única persoa no mundo que pode impedir unha guerra que podería reducir á humanidade ao estado salvaxe. Ten que pagar vostede ese prezo por un obxectivo, por moi digno que poida parecerlle? Quererá escoitar o chamamento dunha persoa que evitou deliberadamente o método da guerra, non sen considerable éxito? De todos os xeitos, conto de antemán co seu perdón se cometín un erro ao escribirlle.
Queda á súa disposición, o seu amigo, M.K. Gandhi
Comentarios
Publicar un comentario
Grazas por comentar!