Volve o lume, a vinganza, e o aceiro valyrio. Volven as espadas, os dragóns e as disputas nobiliares polo trono. Volven os lobos, a Garda da Noite e a ameaza ao outro lado do enorme Muro de Xeo. Volve a emoción... Volve Xogo de Tronos.
Clic na imaxe, para ver o tráiler da 4ª temporada.
A saga trata da loita entre diferentes Casas Nobiliares por un mesmo trono, o control e o poder das terras de Poñente. Non é que pretenda ser unha recreación da Europa da Idade Media. Xogo de Tronos non é unha recreación da Historia. É mellor: é ficción con reminiscencias históricas. É certo que nela hai elementos fantásticos, pero son un aderezo: o que predomina é unha base histórica. Hai castelos, hai armas medievais, hai casas señoriais con escudo e lema familiar, xerarquías e relacións feudovasalláticas, conspiracións e matrimonios de convenencia, incestos e tamén algo de sexo e violencia explícita. Que ao meu modo de ver son todo un acerto, porque dan moita máis veracidade á historia, embrutecéndoa sen tabúes e diferenciándoa doutras sagas de tema similar. Por iso, se tivéramos que explicar a historia medieval, moitos aspectos da serie serviríannos para entender mellor aquela época.
Calquera que vexa dous capítulos verá que as mulleres son o personaxe forte, intelixente e clave de toda a trama. Unha trama que comeza quince anos despois dunha rebelión que rematou coa dinastía reinante: os Targaryen. O novo rei morre sen descendencia lexítima para ocupar o trono, pois os fillos que deixa son froito en realidade das relacións da raíña co seu propio irmán. Ao saberse que non son estes fillos lexítimos do defunto rei, discútese o seu dereito ao trono, e comeza unha carreira e loita encarnizadas entre aspirantes de varias casas señoriais por lograr facerse co poder e o control dos Sete Reinos de Poñente. Mentres, ao Leste, os herdeiros dos Targaryen, que lograron salvarse no seu día da matanza de toda a súa familia, tratan de volver para recuperar o que lles pertence. E fano axudados dalgo que todos crían desaparecido para sempre: os dragóns. Pero toda esta loita non terá ningún sentido se a Garda da Noite non logra conter aos salvaxes que ameazan con desbordar o gran Muro de Xeo situado ao Norte.
En Xogo de Tronos non hai bos nin malos. En calquera momento podes chegar a entender ou sentir aprecio, pois todos senten e padecen, acertan ou se equivocan, todos teñen defectos e virtudes... Ou case. O que si hai é un trama complexa e moi coidada, personaxes de carácter ben marcado, conversas agudas e intelixentes, e xiros absolutamente inesperados. Deses que te deixan cos dentes afiados, goteando e pedindo máis.
Só pola fermosa música de cabeceira, xa paga a pena vela.
A disfrutala!
Comentarios
Publicar un comentario
Grazas por comentar!