Un palo!

Todos coñecemos este anuncio e nos partimos de risa ao velo. Non vos pasa? Pero... Cantos saben o que anuncia? E sobre todo: Cantos compraron o que anuncia? Pois eu diría que poucos. Seguro! Así que a pregunta é: Porque demo unha empresa fai un anuncio así?

Ceo santo. É que ninguén lle vai dar un Oscar a este rapaz?

Lembrades as técnicas de venda dos supermercados? Ese carro da compra que se vai á esquerda para facilitarnos coller as cousas coa dereita, eses produtos imprescindibles situados ben ao fondo para que de camiño collamos outras cousas, ese poñer o que ten máis marxe de beneficio nos lugares máis visibles... A publicidade é un mundo do máis curioso. Baixo un aspecto sinxelo, ocúltase toda unha maraña de estratexias e psicoloxías, cada vez máis sofisticadas, encamiñadas a levarnos ao horto.

A estratexia deste anuncio é de libro. Chámanlle Emotional Branding. A idea consiste en lograr conectar ás persoas coa marca. E o camiño para iso non é vendernos as bondades do produto, non, senón tocarnos as emocións a través dunha historia chula coa que nos sintamos identificados. Seguro que mentres ledes isto algúns estaredes pensando, por exemplo, nos anuncios de Gadis. E si, tedes razón! En ambos casos, cóntasenos unha historia que nos resulta cercana e familiar, que nos parece moi nosa, e que enriba nos fai rir! Gústanos porque conecta con nós. E así, entre risas, sen apenas darnos conta, asociámonos con esa marca, porque nos gusta o que transmite.

Fixádevos aquí no escenario! Quen non estivo nunha festa así? Ese mantel a raias, ese sofá cheo de porcalladas, mesmo ese amigo con gafas... E sobre toda esa ilusión de verse ante un par de regalos por abrir. Ti ves a escena e es capaz de verte nela, e ata de sentir nostalxia dos tempos que se foron. É nese ambiente "coñecido" no que de repente nos amosan esa reacción absolutamente orixinal e divertida, para transmitirnos a idea de que son as cousas sinxelas e auténticas as que nos fan felices. Coma un simple pau. Ou mira ti por onde, como o que se anuncia: unha limonada!

A idea está tan pensada que mesmo hai unha web na que ver e gañar o pau!

Pero un momento... Só teñen preparado o do pau? 

Noooon! Hai máis xoguetes, cada un co seu anuncio!

Clic nas imaxes!

Por exemplo, tamén está (encántame) "La caja":

E desde logo, non podía faltar o xoguete de urxencia "La piedra":

Cantas veces falamos da importancia de ser creativos? As marcas buscan persoas creativas porque o que queren é destacar, ser singulares, amosarse orixinais, diferentes e cercanos ás persoas. De aí ese novo interese por humanizar os anuncios... E por sacarnos un sorriso. Obviamente sabemos que teñen un fin comercial, pero... que queredes que vos diga? Coas risas que un se bota con este rapaz, o que penso é que oxalá todos foran así!

Lembrade. Cando vos toque gañarvos a un público:

 Creatividade, e a polas emocións!