04/03/13

Zombies nas Carolinas

04/03/13

Que pinta esa especie de labazada alemana na cara dun rei español? 

En 1897 o mundo era The Walking DeadHabía moito zombie famento de territorios, e España era un imperio en farrapos con golosas colonias sobre as que botarse (as últimas). Cuba era unha delas, e Estados Unidos era o zombie máis interesado. Varias veces tentaron comprala, pero os españois non fixeron moito caso. Así que en 1898 os estadounidenses pasaron a un provocativo plan B:
-Mandamos un acorazado de guerra, poñémolo en fronte da illa, e a ver que fan... 
Nada. Nin mu. É máis: fixéronse amigos. Por iso estrañou tanto que unha noite, sen vir a conto de nada, mentres había baile na illa, e cos españois máis quietos cá unha pedra, o barco estoupase en mil cachos. 256 mortos, contáronse. Estados Unidos declarou a guerra a España, e en dous telediarios perdemos os poucos territorios de ultramar que nos quedaban. De aí a frase Más se perdió en Cuba... unha especie de Malo será!, pero en castelán.

E agora, o que nos trae. Esa moeda é española, duns anos antes do relatado, e circulaba nas illas Carolinas e Marianas, no océano Pacífico. Tras o de Cuba, que implicou tamén a perda de Puerto Rico e de Filipinas, esas illas eran o único que quedaba. Tan único, que non había nin barcos para defendelas. Por iso, España viuse abocada a vender. Polo menos sacaría algo por elas. E aí é onde aparece un novo zombie: Alemaña. Por 25 millóns de pesetas, as Carolinas e as Marianas foron papadas polo zombie alemán. E como testemuño histórico daquilo, todas as moedas españolas en circulación nas illas foron marcadas con esa labazada circular sobre o rostro infantil de Alfonso XIII (avó do actual Rei). Nela, como vedes, aínda pode lerse: 

W.II.KAISER.KRLNSN. 
(II Imperio Alemán, Emperador Guillermo II)

Lección 1: a Historia está en todas partes...  Mira.
Lección 2: a Historia é circular: sempre gañan os zombies... Para que ver The Walking Dead?

Recibe os contidos no teu correo

0 comentarios

Publicar un comentario

Grazas por comentar!

ˆ
MIGUEL ABRAIRA © - DISEÑO: HERPARK