Hoxe fai xusto un ano. Do barco, do pánico e da rata.
Eran as nove da noite. Un mamotreto flotante de 300 metros de eslora (tres campos de fútbol), movíase torpe e pesado, con máis luces cá unha árbore de Nadal, fronte á illa de Giglio, na costa italiana. Os pasaxeiros, máis de catro mil (o dobre que no Titanic), repartíanse a esas horas entre os 5 restaurantes, 13 bares, 4 piscinas, o ximnasio de dous pisos, o salón de teatro ou os 1500 camarotes do barco. Se é que a algo así se lle pode chamar barco. En cuberta, algúns pasaxeiros comentaban entre asombrados e inquietos o preto que se vía a costa, as casas e o pequeno porto da illa. Aínda que colosal, a sensación que compartían era a dun perigo evidente e innecesario. E de repente, sentiron un golpe estraño.
Pouuum... Sonou ronco, rudo, grave. Ao pouco, infórmase (vídeo AQUÍ). Non pasa nada señores, un erro eléctrico, sigan gozando do cruceiro... E no tempo que os máis cautos tardaron en ir por un chaleco salvavidas, o mastodonte de luces comezou a escorarse pesadamente, inclinándose sobre o mar coma unha besta ferida. Coa auga colándose polos sesenta metros de fenda aberta no casco. A partir de aí, o pánico. Berros, sinais de emerxencia, caras desencaixadas e catro mil pasaxeiros correndo e empurrándose ao bruto para lograr meterse nun bote e abandonar aquilo. Igual cá no Titanic, salvo algún traballador amable, nin un mariño, nin un oficial, nin un protocolo de actuación, nada que achegara aquela especie de Sol Meliá a un barco de verdade... Quizais porque un cruceiro nunca é un barco de verdade.
E aquí vén o didáctico. Porque mentres isto sucedía, coa xente soa e asustada lanzándose ao mar, o comandante do porto, estrañado pola falta de contacto co capitán (responsable da manobra, do navío e das catro mil vidas a bordo), entérase de que este non está no barco. Incrédulo, insiste en chamalo, e cando por fin logra contactar co capitán déixanos esta impresionante gravación. Que, máis aló da bronca, ensina por si soa o significado da palabra responsabilidade, e o significado da expresión fuxir como unha rata. Para escoitar, clic na imaxe ou AQUÍ.
Comentarios
Publicar un comentario
Grazas por comentar!